Die Stad Tshwane het van die Pretoria-hooggeregshof se uitspraak oor die heffing van R194 per maand vir die stad se reiniging deur privaat vullisverwydering kennis geneem en aangedui hulle gaan teen die uitspraak appelleer. AfriForum het ’n hofoorwinning behaal toe die hooggeregshof die heffing onwettig en ongeldig verklaar het. Die heffing is met onmiddellike effek ter syde gestel.
AfriForum het aangevoer die heffing kom neer op dubbele belasting, veral waar inwoners reeds vir privaat vullisverwydering betaal. Die hof het beveel dat alle heffingsbedrae aan verbruikers gekrediteer moet word en dat geen verdere heffing verhaal mag word nie. Waarnemende regter George Avvakoumides het die metro gekritiseer vir die gebruik van irrelevante dokumente en misleidende argumente. Hy het ook ’n kostebevel teen die metro toegestaan.
“Die instelling van hierdie heffing was onwettig en arbitrêr,” het Deidré Steffens van AfriForum gesê. Arno Roodt het bygevoeg: “Die hof se beslissing wys dat gemeenskappe bereid is om onbillikheid te beveg.”
Rdl. Obakeng Ramabodu, burgemeesterskomiteelid vir omgewings- en landboubestuur van die Stad Tshwane, sê daar sal geappelleer word, “aangesien geglo word dat ’n reinigingsheffing wat gemik is op die instandhouding van ons stortingsterreine, ’n stap in die regte rigting is. Dit is noodsaaklik om ’n veilige en skoon stad vir almal te verseker.”
Volgens Ramabodu is die heffing nie uniek aan Tshwane nie en is dit reeds tussen 2016 en 2021 deur die vorige regering ingestel.
Druk hier om AfriForum se volledige verklaring te lees.
Lees die Stad Tshwane se verklaring hier onder:
