VRYSTAAT. – Twee jong broers, 9 en 14 jaar oud, is op ’n plaas naby Harrismith vermoor. ‘n 31-jarige man is aangehou nadat hy glo met ‘n bebloede kledingstuk van een van die slagoffers betrap is.
AO Mmako Mophiring, polisiewoordvoerder, sê die voorval het Woensdagmiddag op die Toekoms-plaas plaasgevind. Reanetswe Lakaje (9) en Thabiso Lakaje (14) is na bewering deur iemand wat aan hulle bekend was, aangeval.’n Veiligheidswag het die seuns by hul woning aangetref met hul hande vasgebind en hul monde gesnoer.
Die plaasbestuurder is ontbied en nooddienste is gekontak. Die 14-jarige seun is dood verklaar, terwyl sy jonger broer na ’n hospitaal geneem is waar hy later aan sy beserings beswyk het. Die kinders se ma was ten tyde van die voorval by die werk en is later van die tragedie ingelig. ‘n Man word tans ondervra, maar hy word nie as die hoofverdagte in die saak beskou nie. Pogings om die persoon wat vermoedelik vir die aanval verantwoordelik is, op te spoor, duur voort.
Die motief vir die aanval en moorde is nog onbekend. Die polisie ondersoek die saak en vra enigiemand wat inligting oor die verdagte het om na vore te kom. Lt.kol. Mpholo kan by 082 854 7542 gebel word.
