NOORDWES. – Twee polisielede het die naweek gesterf, na bewering aan hulle eie hande. Die een het vermoedelik eers sy vrou doodgeskiet.
Brig. Sabata Mokgwabone sê ‘n adjudantoffisier (58), verbonde aan Mahikeng-OOP, het Saterdagoggend vroeg glo eers sy vrou (46) in die Dithakong-woonbuurt doodgeskiet en daarna homself om die lewe probeer bring. Die egpaar is in die slaapkamer gevind, waar die vrou dood verklaar is. Haar man is met aankoms by ‘n hospitaal dood verklaar. Die motief vir die insident is onbekend, maar ‘n dossier vir moord en ‘n geregtelike doodsondersoek is geopen.
Sondagoggend het ‘n luitenant-kolonel, verbonde aan die taktiese reaksie-eenheid (TRT) homself glo in New Macaviestraat, buite Potchefstroom, doodgeskiet. Vuilspel word nie vermoed nie. ‘n Geregtelike doodsondersoek is geopen.
Lt.genl. Sello Kwena versoek lede om van die dienste van EHW (Employee Health and Wellness) gebruik te maak om sielkundige hulp te bekom. Kwena het simpatie aan die familielede, vriende en kollegas van die drie oorledenes betuig.
