GAUTENG. – ‘n Saak van strafbare manslag word ondersoek nadat twee verdagtes Dinsdag in ‘n botsing tussen ‘n polisievangwa en ‘n privaat voertuig in Sunnyside, Pretoria, gesterf het. Vyf polisiebeamptes is beseer.
Kol. Mavela Masondo sê die polisie het drie verdagtes vervoer wat van die diefstal van ‘n motorvoertuig beskuldig en pas gearresteer is. ‘n Ongeluk met ‘n Hyundai Atos het in Parkstraat, Arcadia, plaasgevind, waarna die twee verdagtes op die toneel dood is. Voertuigstoringstoerusting (jammers) en verskillende stelle registrasieplate is glo in die verdagtes se besit gevind.
Polisielede en ‘n derde verdagte, wat in die ongeluk beseer is, is vir mediese hulp na hospitale vervoer. Die bestuurder van die Hyundai is nie beseer nie.
Volgens Vision Tactical is die beweerde gesoekte verdagtes vir voertuigdiefstal in ‘n gesamentlike operasie met die polisie onderskep. ‘n Gesteelde voertuig is glo ook volgens dié diens teruggevind.
Foto’s: Vision Tactical
