WES-KAAP. – Die polisie in die provinsie het die publiek gewaarsku oor ’n valse Truecaller-profiel wat gekoppel is aan die landlynnommer 021 811 2463 en valslik die naam van lt.genl. (adv.) Thembisile Patekile vertoon.
Kol. Andrè Traut, polisiewoordvoerder, sê in ‘n verklaring hierdie profiel het geen verband met die provinsiale kommissaris of die polisie nie. Die publiek word gewaarsku om nie met oproepers van hierdie nommer te skakel of enige persoonlike inligting te deel nie. Verdagte oproepe of bedrog moet by die naaste polisiekantoor of deur die SAPD se Stop Misdaad-nommer 08600 10111 aangemeld word.
Die polisie beklemtoon dat amptelike kommunikasie altyd deur wettige kanale geverifieer moet word.
