MALEDIVE. – Vanes-Mari du Toit het op haar verjaardag ’n besonderse aankondiging met haar volgelinge gedeel terwyl sy by Heritance Aarah in die Raa-atol in die Maledive kuier. Du Toit het ’n video gedeel waarin sy ’n swangerskapstoets wys wat aandui dat sy swanger is.
Die voormalige Protea-netbalspeler en bekende televisie-aanbieder het op sosiale media geskryf dat sy haar verjaardag in die Maledive vier, danksy AfricaStay en Heritance Aarah, en dat dit volgens haar die perfekte geleentheid was om hul “grootste geskenk” met haar volgelinge te deel. Hoewel sy nie presiese besonderhede bekend gemaak het nie, gee die hutsmerke wat sy gebruik het leidrade. Die plasing bevat onder meer #BabyMoon, #2Aug, #22weke en #DueDecember, wat kan beteken dat sy tans 22 weke swanger is en dat die baba na verwagting in Desember gebore sal word. Die nuus kom nadat Du Toit en Frikkie vroeër vanjaar hul liefde in ’n intieme seremonie met familie en vriende gevier het.
Du Toit het oor die jare bekendheid verwerf as Protea-netbalspeler en het Suid-Afrika internasionaal verteenwoordig. Sy het later haar loopbaan na televisie uitgebrei en is onder meer as aanbieder en sportkommentator bekend. Sy was ook in 2018 ’n deelnemer aan Dancing with the Stars SA, waar sy saam met Johannes Radebe tot die halfeindronde gevorder het.
Die aankondiging van die nuwe toevoeging tot hul gesin het intussen talle gelukwense op sosiale media ontlok.
