Kyk in die AfriForum video-opname hier onder hoe verskeie ondersteuners in die omgewing van die hof saamdrom en die omstrede Kill the Boer-lied sing.
OOS-KAAP. – Die polisie sê hulle is ten volle voorbereid om die openbare orde te handhaaf tydens die vonnisoplegging van Julius Malema wat vandag en Donderdag (15 en 16 April) by die Oos-Londen-landdroshof in KuGompo City sal plaasvind.
Brig. Nobuntu Gantana, polisiewoordvoerder, sê voldoende beamptes is ontplooi om die veiligheid van hofpersoneel, regspanne, die beskuldigde, die media en die publiek te verseker. Die ontplooiing is gebaseer op ’n deeglike risikobepaling en sekere operasionele besonderhede sal om veiligheidsredes nie bekend gemaak kan word nie. Die polisie sal egter ’n sigbare teenwoordigheid in en om die hof hê, insluitend openbare-orde-polisiëringseenhede, om te verseker dat die verrigtinge sonder enige ontwrigting verloop.
Motoriste word gewaarsku oor padsluitings in en om die hofgebied, insluitend Oxfordstraat, Fleetstraat en ander sentrale roetes. Alternatiewe roetes soos die N2 en R72 word aanbeveel, en die publiek word gevra om die gebied tydens die verrigtinge te vermy. Gantana vra die publiek voorts om slegs amptelike inligting te volg en nie onbetroubare sosialemediaberigte te versprei nie. Enige onwettige optrede sal streng volgens die wet hanteer word.
Bronne: eNCA, AfriForum en SAPd
