NOORDWES. – Nkosinathi Ziyanda Khumalo (30) bly in aanhouding tot hy weer op 24 November in die Mogwase-landdroshof vir borgtog aansoek sal doen. Khumalo is in KZN in hegtenis geneem nadat hy glo vir Innocent Buthelezi in Julie vermoor en sy vingerpunte en privaat ligaamsdele afgesny het.
Brig. Sabata Mokgwabone, polisiewoordvoerder, sê in ‘n verklaring Khumalo is op 30 Oktober in KZN in hegtenis geneem en het aanvanklik op 31 Oktober op aanklagte van die besit van ‘n onwettige vuurwapen en ammunisie in die Estcourt-landdroshof verskyn. Hy is daarna na die Noordwes-provinsie geneem waar hy op 3 November vir die eerste keer, op ‘n aanklag van moord, in die hof voorgekom het.
Die moord hou verband met ‘n beweerde moeti-moord wat in Maologane-dorp in die Sun City-polisiegebied plaasgevind het. Hy is met die ondersoek aan die misdaad verbind. Tydens sy inhegtenisneming is die oorledene se vuurwapen en agt rondtes lewendige ammunisie by hom aangetref. Daarna is hy na die Noordwes-provinsie geneem vir sy verskyning in die Mogwase-landdroshof.
