VRYSTAAT. – ‘n Verdagte (41) is Vrydag met ‘n aantal vermoedelik gesteelde Luvigen- en Myteladov- tablette in Phakathirylaan, Thabong, naby Welkom, gearresteer.
Lt.kol. Thabo Covane sê eenhede was met operasie Vala Umgodi besig toe ‘n wenk van ‘n man wat vermoedelik gesteelde eiendom in sy besit het, ontvang is. Die inligting is opgevolg en die verdagte wat aan die beskrywing voldoen, is opgemerk. Hy is gestop en deursoek, waarna 30 bottels Luvigen en 30 bottels Myteladov-tablette gevind en op beslag gelê is. Polisielede het by ‘n plaaslike apteek bevestiging gekry dit is antiretrovirale medikasie.
“‘n Saak van die besit van vermoedelik gesteelde eiendom, met ‘n bykomende klag van die oortreding van die wet op medisyne en beheerde stowwe is by Thabong-polisiestasie geopen.”
Die verdagte is aangehou en sal na verwagting binnekort in die hof verskyn.
