GAUTENG. – ‘n Verdagte gewapende rower is Maandagmiddag in die middestad van Johannesburg deur die polisie doodgeskiet. Nog ‘n verdagte is gewond.
Kol. Dimakatso Nevhuhulwi sê twee sektorbestuurders van Johannesburg-Sentraal-polisiestasie het inligting ontvang van ‘n verdagte Quatum minibustaxi sonder ‘n nommerplaat met ses insittendes wat opgemerk is. Die sektorbestuurders is na die toneel van die verdagte voertuig en het gevind ‘n slagoffer van ‘n Toyota Tazz is reeds in die minibus ingedwing, terwyl daar probeer is om ‘n tweede slagoffer uit die Tazz te verwyder.
Die verdagtes het die polisie opgemerk en na hulle geskiet, waarop die polisielede teruggeskiet het. ‘n Verdagte is noodlottig getref en nog een is gewond. Vier verdagtes het te voet van die toneel gevlug.
Twee vuurwapens, waarvan die reeksnommers afgevyl is, is in die verdagtes se besit gevind. Die gewonde verdagte is vir mediese behandeling na ‘n hospitaal geneem. Hy sal van gewapende roof, ontvoering en kaping aangekla word.
