NOORDWES. – Karabo Lipson Matlala (23) is op 13 Oktober in hegtenis geneem nadat hy glo ‘n voertuig tydens ‘n toetsrit gesteel het. Die voorval het op die N12 tussen Klerksdorp en Wolmaransstad plaasgevind. Hy sal weer Vrydag vir ‘n borgtogaansoek in die hof verskyn.
Volgens kol. Adéle Myburgh, polisiewoordvoerder, spruit die inhegtenisneming uit ’n voorval waarin Matlala na bewering ’n motorhandelaar in Orkney besoek het en voorgegee het dat hy ’n voertuig wou aankoop. Tydens die toetsrit het hy by ’n winkel in Klerksdorp gestop en die handelaar gevra om vir hom koeldrank te gaan koop. Terwyl die handelaar in die winkel was, het Matlala glo met die voertuig weggery.
Die gesteelde voertuig is later opgespoor en deur die polisie gestop. Dit is onbeskadig teruggevind.
Matlala het op 15 Oktober in die Wolmaransstad-landdroshof verskyn op aanklagte van voertuigdiefstal en besit van ’n vermoedelik gesteelde voertuig. Hy bly in aanhouding en sal Vrydag weer in die hof verskyn vir sy borgtogaansoek.
