KWAZULU-NATAL. – Twee verdagtes is vanoggend vroeg (Maandag) tydens ‘n skietery met polisiebeamptes dood. Die voorval het in Uvongo, in die Margate-polisiëringsgebied plaasgevind, waartydens daar op vyf ongelisensieerde vuurwapens beslag gelê is.
Luidens ‘n verklaring van kapt. Ntathu Ndlovu het die polisie inligting ontvang oor persone wat glo onwettige vuurwapens in hulle besit het. Polisiebeamptes het ’n huis genader en hulle teenwoordigheid aangekondig, maar geen reaksie ontvang nie.
Met betreding van die woning het twee persone met vuurwapens op die polisie losgebrand. Die polisiebeamptes het teruggeskiet, waartydens die verdagtes noodlottig gewond is. Geen polisiebeampte is tydens die voorval beseer nie.
Twee AK47-aanvalsgewere en drie pistole is op die toneel gevind.
