VRYSTAAT. – Vyf verdagtes is Sondagaand deur Bloemfontein-blitspatrollielede op die N1 onderweg van Gauteng na Kaapstad met dagga ter waarde van ongeveer R1 m. vasgetrek.
Sers. Mahlomola Kareli sê inligting van die vragmotor is ontvang en dit is opgemerk waar dit net voor Edenburg geparkeer gestaan het. ‘n Wit VW Polo was langs die vragmotor parkeer. Tydens deursoeking is bokse Swati-dagga verpak in die sleepwa van die vragmotor gevind.
Kareli sê tydens die vragmotorbestuurder se arrestasie het die insittendes van die Polo ‘n som geld vir die polisie aangebied om die inhegtenisneming te keer. Die geld is oorhandig, waarna die verdagtes in hegtenis geneem is. Die geld is as bewysstukke by die polisie ingehandig.
Vyf verdagtes sal na verwagting binnekort vir handel in dagga en korrupsie in die Edenburg-landdroshof verskyn.
Foto’s: SAPD
