GAUTENG. – Drie verdagtes, verbonde aan die nasionale departement van gesondheid, is vanoggend (Maandag) met lasbriewe in hegtenis geneem vir bedrog en diefstal van meer as R1 miljoen in stryd met die wet op finansiële bestuur.
Kol. Katlego Mogale, Valke-woordvoerder, sê die verdagtes, onderskeidelik 67, 46 en 55 jaar oud, word daarvan beskuldig dat meer as R1 miljoen gedurende 2023 onwettig aan ’n diensverskaffer toegeken is. Een van die verdagtes se maatskappy is ook as vyfde regspersoon aangekla. ‘n Vierde verdagte, die diensverskaffer en haar maatskappy, is nog nie in hegtenis geneem nie. Die inhegtenisnemings volg op ’n ondersoek wat sedert April 2024 aan die gang is.
Die drie verdagtes behoort na verwagting binnekort in die Pretoria- gespesialiseerde kommersiële misdaadhof te verskyn.
