MPUMALANGA. – Twee verdagtes wat glo Maandag ‘n Duitse toeris in Graskop ontvoer en beroof het, is deur die polisie gearresteer.
Kol. Donald Mdhluli sê die verdagtes het die toeris, wat kort vantevore geld by ‘n OTM by ‘n vulstasie onttrek het, aangeval. Die polisie het dadelik gereageer na hulle deur ‘n lid van die publiek gekontak is. Inligting het aangedui die verdagtes ry met ‘n Hyundai-sportnutsvoertuig, wat vinnig opgespoor en onderskep is.
“Die verdagtes is deur die polisielede in nabygeleë bosse aangekeer. Gelukkig is die slagoffer gered en het hy geen beserings opgedoen nie.”
Mdhluli sê die voertuig wat glo in die misdaad gebruik is, is gekonfiskeer. Voorlopige ondersoek dui aan die voertuig is gehuur.
“Die polisie ondersoek die moontlikheid van bykomende aanklagte teen die verdagtes, insluitend moontlike bande met ander kriminele aktiwiteite waarby dieselfde voertuig betrokke is.”
Die ondersoek duur voort.
