Foto’s in berig.
KWAZULU-NATAL. – ‘n Verdagte (26) is Dinsdag met agt vuurwapens, vyf skokgranate, ammunisie van verskeie kalibers, pantserdeurdringende ammunisie, dwelmvervaardigingsmasjiene en verskillende soorte dwelms in Westham, Phoenix, gearresteer.
Kol. Robert Netshiunda sê inligting van ‘n verdagte met ‘n vuurwapen in elkeen van sy voertuie is ontvang. ‘n Operasie is geloods, waartydens die verdagte glo probeer vlug en gearresteer is. ‘n Vuurwapen en dwelms is in sy besit gevind. Met deursoeking van sy woonstel is op nog twee haelgewere afgekom. Nog vyf vuurwapens is in elkeen van die verdagte se vyf voertuie gevind.
Teen gistermiddag is deur steeds gepoog om die verdagte se luukse- gepantserde sportnutsvoertuig oop te breek. Een van die pistole, R5-ammunisie, haelgeweerrondtes en vermoedelik ook die skokgranate behoort aan die polisie. Ondersoek word gedoen om die oorsprong van die items vas te stel.
Die verdagte is volgens vermoede betrokke by “dwelmgebied-oorlog”, verbyry-skietery en ander dwelmverwante kriminele aktiwiteite.
Hy sal binnekort in die hof voorkom.
