GAUTENG. – Twee verdagtes wat ‘n bejaarde man glo Maandagaand by sy huis aangehou, vasgebind, met ‘n vuurwapen gedreig en besteel het, is in hegtenis geneem. ‘n Derde verdagte is op vrye voet.
Kapt. Johan van Dyk sê verdagtes in ‘n bakkie is Dinsdag omstreeks 00:30 aangemeld wat na bewering ‘n voertuig in Union-rylaan probeer steel het. Veiligheidsbeamptes het die bakkie sonder hoofligte opgemerk, waarna dit in Botha-rylaan gestop is. Die polisie, GPF en plaaslike veiligheidsmaatskappye was vinnig op die toneel. Twee verdagtes is gearresteer en een het gevlug.
Tydens deursoeking is ‘n ongelisensieerde vuurwapen in die bestuurder van die bakkie se besit gevind is. Die bakkie is glo Maandagaand tydens die huisroof van die bejaarde man, saam met ‘n televisie en ander waardevolle items, gesteel.
Van Dyk sê die sukses is aan die samewerking tussen die SAPD en E2 Security Partners, sowel as GPF-lede te danke. Die veiligheidspersoneel en GPF-lede is vir hulle aandeel in die sukses bedank, terwyl brig. Moses Dladla, die waarnemende distrikskommissaris, die samewerking geprys het.
