KWAZULU-NATAL. – ‘n Besoekende tandarts van die Verenigde Koninkryk is in die vroeë oggendure by ‘n hospitaal dood verklaar nadat hy uit die venster van die derde verdieping van ‘n gebou in Ramsgate geval het.
Craig Botha van KwaZulu Private Ambulance Service sê dié diens het hulle omstreeks 00:30 na ‘n kritieke noodgeval gehaas. Met aankoms op die toneel het paramedici onmiddellik gevorderde lewensondersteuning op die kritiek beseerde man toegepas.
Botha sê voorts tydens vervoer na die hospitaal het die pasiënt se toestand beduidend verswak, wat paramedici genoop het om resussitasie (KPR) toe te pas. Ten spyte van die pogings van die noodspan en hospitaalpersoneel is die pasiënt by die hospitaal dood verklaar.
KwaZulu Private Ambulance Service het meegevoel met die oorledene se familie, vriende en kollegas betuig.
