GAUTENG. – Die vlieënier van ‘n ligte Cessna 210 vliegtuig is Donderdag, omstreeks 10:00, dood toe sy vliegtuig neergestort het kort ná dit by die Lanseria Internasionale Lughawe opgestyg het. Die (enigste) passasier is in die voorval ernstig beseer en is per lugambulans na ’n hospitaal vervoer.
Sisa Majola, kommunikasiebestuurder van die burgerlugvaartowerheid (SACAA), het aan Nuusflits gesê dat die vliegtuig in die nabygeleë gebied van die Renoster- en Leeu Natuurreservaat neergestort het.
Die Afdeling vir Ongeluk- en Voorval-ondersoeke (AIID) het ondersoekers na die toneel gestuur. Volgens Majola sal ’n voorlopige verslag oor die voorval binne 30 dae vanaf die datum van die ongeluk op die SACAA-webwerf gepubliseer word.
Het jy kommentaar oor die berig? Jy kan nou aan Nuusflits lesersbriewe skryf en dalk word joune gepubliseer. Rig jou brief aan die redakteur by nuus@nuusflits.com
