Meer foto’s in berig.
WES-KAAP. – Twee skepe van China, die Tangshan en die Taihu, het Woensdag ter voorbereiding van die Will For Peace 2026, wat van vandag (Vrydag) tot 16 Januarie 2026 in Suid-Afrikaanse territoriale waters plaasvind, aangekom. Die multinasionale maritieme oefening word deur China gelei.
Luidens ‘n verklaring van die Suid-Afrikaanse nasionale weermag is die oefening daarop gemik om samewerking, operasionele gereedheid en maritieme veiligheid te versterk. Die oefening bied ’n platform vir deelnemende vlootmagte om beste praktyke uit te ruil en gesamentlike operasionele vermoëns te verbeter, wat bydra tot die veiligheid van skeepsroetes en streeks- maritieme stabiliteit.
As deel van die voorbereidings het maj.genl. Godfrey Thulare, bevelvoerder van die gesamentlike operasionele hoofkwartier, Donderdag ’n inligtingsessie bygewoon en terreinbesoeke by die vlootbasis in Simonstad afgelê.
Volgens verskeie berigte sal die oefening nie net Suid-Afrika en China insluit nie, maar ook ander lande se vlootmagte. Skepe van Iran het reeds in Suid-Afrikaanse waters aangekom. Daar word verwag dat Rusland ook sal deelneem, alhoewel amptelike besonderhede oor elke deelnemende staat nog nie deur die regering bevestig is nie
Bronne: SANW, EWN, Daily Maverick, Business Insider Africa
