LIMPOPO. – Die Mankweng-polisie het Sondagaand ‘n voertuig langs die R71, naby ‘n oornagverblyffasiliteit, in ‘n sloot aangetref. ‘n Man (50), die bestuurder van die voertuig, is daar naby met skietwonde aangetref en na ‘n nabygeleë hospitaal gehaas, waar hy dood verklaar is.
Kol. Malesela Ledwaba, provinsiale polisiewoordvoerder, sê in ‘n verklaring aan Nuusflits die polisie is omstreeks 23:30 na die toneel ontbied en het met aankoms die wit sedan in ‘n sloot en die bestuurder met skietwonde aangetref. Voorlopige ondersoek dui daarop dat die slagoffer deur twee onbekende verdagtes in die voertuig geskiet is. ‘n Soektog is na die verdagtes geloods wat te voet van die toneel gevlug het. Ooggetuies beweer die verdagtes het Zoeloe gepraat. ‘n Saak van moord is geopen.
Enigiemand met relevante inligting wat tot die verdagtes se inhegtenisneming kan lei, word gevra om sers. Samuel Malemela by 76 749 8403 te bel.
Het jy kommentaar oor die berig? Jy kan nou aan Nuusflits lesersbriewe skryf en dalk word joune gepubliseer. Rig jou brief aan die redakteur by [email protected]
