VSA. – Die hoop op vrede tussen die VSA/Israel en Iran het opgevlam nadat ‘n voorstel vir ‘n 14 dae lange skietstilstand tussen Teheran en Washington Dinsdag bereik is. Die voorstel sluit onder meer die heropening van die strategies belangrike Straat van Hormoes en die opskorting van militêre optrede vir ’n tydperk van twee weke in.
President Trump het op Truth Social gesê die VSA is bereid om aanvalle op Iran tydelik te staak, mits daar samewerking is om veilige deurgang in die Straat van Hormoes te verseker. Volgens hom volg die besluit ná gesprekke met die Shehbaz Sharif en Pakistan se militêre leierskap, wat bemiddel het om spanning in die streek te verminder. Die Withuis het bevestig dat die voorgestelde wapenstilstand deel vorm van breër onderhandelinge wat daarop gemik is om ’n langertermyn-vredesooreenkoms in die Midde-Ooste te bereik. Trump het ook aangedui dat verskeie kernkwessies reeds tussen die partye bespreek en deels opgelos is.
Aan die Iranse kant het Seyed Abbas Araghchi, die land se minister van buitelandse sake, in ’n amptelike verklaring gesê dat Iran bereid is om sy militêre reaksies te staak indien aanvalle teen die land ophou. Hy het bygevoeg dat veilige deurvaart deur die Straat van Hormoes vir ’n beperkte tydperk moontlik gemaak kan word, onder streng koördinering deur Iran se gewapende magte.
Die voorgestelde ooreenkoms volg op intensiewe diplomatieke pogings, insluitend versoeke vir onderhandelinge gebaseer op voorstelle van beide die VSA en Iran. Die fokus is tans op die finalisering van ’n raamwerk wat nie net onmiddellike konflik kan verminder nie, maar ook die weg kan baan vir volhoubare vrede in die streek.
