KWAZULU-NATAL. – Ongeveer 30 kinders by ‘n kleuterskool in Redcliffe se gille het vermoedelik Dinsdagmiddag ‘n misdaad voorkom. ‘n Voornemende betreder met ‘n masker is glo deur hulle reaksie verjaag.
Reaction Unit South Africa sê dit wil voorkom asof ‘n betreder omstreeks 16:00 toegang tot ‘n bejaarde vrou se huis probeer kry het. Die kleuterskoolkinders het vermoedelik die man, wat glo uit digte bosse gekruip het, gewaar.
Die kinders het geskree en sodoende hulle versorgers gewaarsku, wat op hulle beurt ook die beweerde oortreder gesien het. Terwyl die kinders bly skree het, is oproepe vir hulp na Rusa gemaak. Die verdagte het naderhand glo onverrigter sake gevlug, sonder dat hy toegang tot die bejaarde se huis kon verkry.
Reaksiebeamptes het die bosse vir die verdagte gefynkam. Niemand is opgespoor, of in hegtenis geneem nie.
