Sivenathi Toto (23) is op 26 Augustus 2022 na ‘n “wraak-aanval” in Lawaaikamp, George, vir dood agtergelaat.
Women For Change sê sy is na bewering deur haar kêrel se teenstander aangeval.
Shaun Madonono (23) het glo ‘n geveg verloor en by Toto se kêrel se huis, waar sy gelê en slaap het, ingebreek en haar aangerand.
Daarna het hy haar na bewering na sy eie plek gesleep en haar onophoudelik aangerand.
Nadat sy haar bewussyn verloor het, is sy na bewering na ‘n bakkie gesleep en op ‘n stortingsterrein agter ‘n vulstasie gegooi, waar sy deur ‘n petroljoggie ontdek is.
Toto het glo as gevolg van haar beserings ‘n beroerte-aanval gekry, haar spraak verloor en is aan ‘n rolstoel gebonde.
Women For Change sê sy het in Desember 2022 ‘n beroerte gehad. In April 2023 is sy glo weer in die hospitaal opgeneem met bloeding op haar brein. Sy is met breinskade gediagnoseer en op 3 Mei 2023 ontslaan.
Madonono is op 27 Augustus 2022 in hegtenis geneem en op borg van R2 500 vrygelaat.
Hy word deur klagtes van aanranding met die doel om ernstig te beseer, ontvoering en huisbraak in die gesig gestaar. Hy bly glo in dieselfde straat as Toto.
Volgens Women For Change het Toto nog geen arbeidsterapie, berading, spraakterapie of fisioterapie, wat vir haar welstand noodsaaklik is, van die departement van maatskaplike ontwikkeling ontvang nie.
Die terapie is ook nodig sodat sy die regte mediese verslae kan bekom om haar saak in die hof te ondersteun.
Women For Change eis geregtigheid vir Toto deur middel van die inhegtenisneming van Madonono en voel dat ‘n klagte van poging tot moord by sy klagtes gevoeg moet word. Hulle is van mening dat borg vir hom van die begin af teengestaan moes gewees het.
Volg FiND iT se Facebookblad hier en klik hier om ons app af te laai. Klik hier vir vandag se nuutste nuus. As jy Afrikaanse Nuus op die Moya App wil lees, volg die skakel.
