OOS-KAAP. – ‘n Vrou (35) is Donderdag in Motherwell op aanklagte van poging tot moord en kindermishandeling op ‘n 3-jarige seun in hegtenis geneem.
Kapt. Sandra Janse van Rensburg, polisiewoordvoerder, sê die Motherwell-polisie het omstreeks 18:30 na die Shukushukuma-gebied gegaan nadat hulle ‘n klagte ontvang het. ‘n Persoon wat beweer het hy is ‘n ooggetuie, het gesê dat hy gesien het hoe die verdagte ‘n kleuter met ’n leë bottel in haar huis aanrand. Hy het toe die huis binnegegaan, die aanval gestop en die polisie gebel. Die seun is met sigbare beserings aan sy kop en gesig deur familielede na ’n hospitaal geneem.
Die verdagte is in hegtenis geneem en sal Maandag, 9 Junie, in die Motherwell-landdroshof verskyn.
Het jy kommentaar oor die berig? Jy kan nou aan Nuusflits lesersbriewe skryf en dalk word joune gepubliseer. Rig jou brief aan die redakteur by [email protected]
