WES-KAAP. – Die liggaam van ‘n vrou (56) is Sondagoggend by Clifton se tweede strand waar sy met haar gesig na onder in die water gedryf het, gevind.
Volgens kapt. Frederick van Wyk is die vrou (56) van Durbanville. Die polisie het omstreeks 14:00 inligting ontvang oor ‘n sak wat op Clifton se vierde strand lê. Inligting oor die vrou en familiekontakbesonderhede is in die sak gevind en haar naasbestaandes is gekontak.
Volgens die NSRI se verklaring het die vrou ‘n geblomde tweestuk-baaikostuum, ‘n geel swempet en ‘n pers Speedo-swembril aangehad.
Plaaslike swemmers het haar liggaam opgemerk en hulp ontbied. Terwyl KPR toegepas is, het ‘n dokter wat op die strand was by die weldoeners aangesluit. Die Stad Kaapstad se watterreddingsnetwerk is omstreeks 08:06 vir die noodgeval geaktiveer.
Ten spyte van alle pogings is die vrou dood verklaar en haar liggaam is deur die staat se patologiese dienste in sorg geneem.
Die NSRI verduidelik dit lyk asof die vrou geswem het en toe verdrink het, maar die polisie het ‘n geregtelike doodsondersoek geregistreer. Die polisie en forensiese patoloë het ook ‘n formele identifikasie van die oorledene aangevra.
Op die The Atlantic Seaboard Community Forum is die voorval ook aangemeld met lede van die gemeenskap wat gekla het oor die tyd wat die oorledene se liggaam op die strand was voordat owerhede dit verwyder het.
In kommentaar is prosesse wat deur verskillende departemente gevolg moet word alvorens ‘n liggaam verwyder kan word, verduidelik.
Bronne: SAPD, NSRI en The Atlantic Seaboard Community Forum
Volg Nuusflits se Facebookblad hier en klik hier om ons app af te laai. Klik hier vir vandag se nuutste nuus.
