NOORDWES. – Rude Sithole (29) is in hegtenis geneem, ná ’n klopjag wat gevolg het op ’n gewapende huisroof in Madibeng Hills naby Klipgat. Verskeie gesteelde items is glo in die verdagte se besit teruggevind.
Konst. Thuto Bobelo, polisiewoordvoerder, sê drie gewapende mans het na bewering in die vroeë oggendure van 22 Februarie ’n gesin oorval en items ter waarde van meer as R190 000 gebuit. Niemand is tydens die voorval beseer nie. Onder die gesteelde goedere was ’n VW Polo TSI, ’n 9 mm-pistool met twee magasynse en ammunisie, selfone, tekkies en ’n WiFi-roeteerder.
Speurders en misdaadintelligensie het die verdagtes se spoor na Midas View in Mabopane gevolg. Tydens ’n operasie op 23 Februarie is ’n vrou in besit van twee vuurwapens en ammunisie, asook ’n WiFi-roeteerder, trouringe en tekkies by ’n woning aangetref. Een vuurwapen se reeksnommer was afgevyl. Die ander een is bevestig as die wapen wat tydens die roof gesteel is. Die vrou kon nie die besit daarvan verduidelik nie. Sy is op die toneel in hegtenis geneem.
Sithole staan tereg op aanklagte van die besit van ongelisensieerde vuurwapens en ammunisie, die besit van vermoedelik gesteelde eiendom en ’n oortreding van die immigrasiewet. Sy het op 24 Februarie in die Ga-Rankuwa-landdroshof verskyn. Sy bly in aanhouding. Die saak is tot 1 April vir ’n formele borgtogaansoek uitgestel.
