WES-KAAP. – Die liggaam van ‘n 69-jarige vrou, wat as vermis aangemeld was, is Vrydag omstreeks 12:15 in die Swartbergpas naby Oudtshoorn gekry. Die Oudtshoorn-polisie ondersoek ‘n saak van strafbare manslag.
Sers. Christopher Spies, polisiewoordvoerder, sê aan Nuusflits ná aanmelding van ‘n vermiste persoon, is vasgestel die vrou se voertuig is teen die pas af. ‘n Soek-en-reddingspan is ontplooi, waarna die voertuig onderaan die krans gevind is. Daarna is verskeie soek-en-reddingsdienste op die toneel ontplooi en die liggaam van die slagoffer met verskeie beserings is gevind. Die liggaam kon later die dag na die padoppervlak gebring word.
Die oorsaak van die ongeluk is nog onbekend en vorm deel van die lopende polisieondersoek.
