TROMPSBURG, VRYSTAAT. – ‘n Vrou (35) het Saterdagaand omstreeks 18:20 tydens ‘n beweerde rusie met haar man gesterf.
Sers. Mahlomola Kareli sê die polisie is na ‘n klagte van aanranding by ‘n huis in Madikgetla ontbied waar fisiese huishoudelike geweld glo plaasgevind het. Met aankoms op die toneel het nooddienste ‘n vrou wat op ‘n bed gelê het behandel, waarna sy dood verklaar is.
Kareli sê voorlopige ondersoek dui aan die egpaar het baklei voordat nooddienste en polisie ontbied is. Die oorledene se geswelde gesig het gebloei. Omstandighede van die rusie en wat tot die vrou se dood gelei het, word ondersoek.
Die man is deur die Trompsburg-polisie in hegtenis geneem en sal binnekort in die hof verskyn.
Die ondersoek duur voort.
