WASHINGTON / ABUJA. – Amerika het Vrydag lugaanvalle in Noordwes‑Nigerië uitgevoer. Dit het uiteenlopende reaksies ontlok. Die Amerikaanse president, Donald Trump, het die teikens as Islamitiese Staat-verwant beskryf.
Trump het in sy verklaring gesê: “Tonight, at my direction as Commander in Chief, the United States launched a powerful and deadly strike against ISIS Terrorist Scum in Northwest Nigeria, who have been targeting and viciously killing, primarily, innocent Christians.” Hy het verder gesê “numerous perfect strikes” is uitgevoer en dat die VSA onder sy leiding nie sal toelaat dat radikale Islamitiese terrorisme floreer nie.
Volgens Nigerië se minister van buitelandse sake het die lugaanvalle binne die raamwerk van veiligheidsamewerking met die Verenigde State plaasgevind en is dit as wettig en presies beskryf. Die ministerie het gesê die optrede was deel van pogings om terrorisme in die streek teen te werk.
Die Economic Freedom Fighters (EFF) van Suid-Afrika het die lugaanvalle in ’n verklaring op hul Facebook‑blad sterk veroordeel. Die party het gesê die reaksie van die Nigeriese staat is “eweneens ontstellend” en dat die ministerie se verklaring, waarin veiligheidsamewerking met die VSA geloof is, nie die houding van ’n selfversekerde en onafhanklike staat weerspieël nie. Volgens die EFF dui dit op ’n vorm van kapitulering wat die narratief van die Verenigde State onderskryf en die indruk skep dat Afrika‑regerings onder druk gebring kan word om buitelandse militêre optrede op hul eie grond te legitimeer. Die EFF het bygevoeg dat die voorval ’n gevaarlike presedent skep vir verdere buitelandse militêre ingryping op die Afrika‑vasteland.
