GAUTENG. – Genl.maj. Solomon Makgato sal as waarnemende hoof van misdaadintelligensie diens doen ná die inhegtenisneming van lt.genl. Khumalo. Die aankondiging is gister deur genl. Fannie Masemola in Vanderbijlpark bekend gemaak waar onwettige vuurwapens vernietig is.
Volgens Masemola bly misdaadintelligensie ’n hoeksteen van die polisie en is noodsaaklik vir die proaktiewe identifisering van kriminele netwerke, die voorkoming van georganiseerde misdaad en die aanwending van hulpbronne om nasionale veiligheid te beskerm. Ná Donderdag se inhegtenisneming van die voormalige afdelingskommissaris as misdaadintelligensiehoof en ses ander, is al sewe senior beamptes tydelik in die organisasie verskuif. Die menslike hulpbron-bestuursafdeling van die polisie het die saak in ooreenstemming met die dissiplinêre regulasies van 2016 verwerk en verdere interne prosesse is aan die gang.
Makgato is tans hoof van die Valke in die Wes-Kaap en beskik oor 36 jaar se ondervinding in intelligensie en speurwerk en het sy B.Tech-graad in polisiëring en ’n nasionale diploma in polisiekunde verwerf.
“Ons het volle vertroue in genl.maj. Makgato en ons glo sy leierskap sal doeltreffendheid verbeter en stabiliteit binne misdaadintelligensie behou,” het Masemola gesê.
Masemola het ook verwys na die erns van interne verdeeldheid en onlangse aantygings binne die diens. “Die huidige situasie is ongekend, kommerwekkend en vereis onwrikbare ingryping om openbare vertroue en stabiliteit te herstel,” het hy gesê.
Hy het bevestig dat die SAPD gereed is om president Cyril Ramaphosa in te lig en herbevestig dat die diens sy grondwetlike mandaat, soos omskryf in artikel 205(3) van die Grondwet, nakom.
Het jy kommentaar oor die berig? Jy kan nou aan Nuusflits lesersbriewe skryf en dalk word joune gepubliseer. Rig jou brief aan die redakteur by [email protected]
