WES-KAAP. – ‘n Simulasie van ‘n ongeluk van ‘n stikstoftenkwa met ‘n ligte motorvoertuig vind Woensdag op Vredenburg plaas. Sekere paaie sal vanaf 10:00 tot 13:00 geaffekteer wees.
Saldanhabaai-munisipaliteit sê die oefening is van belang om inwoners en besoekers aan die area te beskerm indien daar ‘n insident sou plaasvind wat in ‘n ramp kan ontaard: “Die oefening sal ‘n ongeluk tussen ‘n stikstoftenkwa en ‘n ligte motorvoertuig behels. ‘n Lekkasie en veelvoudige beserings sal mediese aandag vereis.”
Die pad in die rigting van Vredenburg sal soos op die kaart aangedui gedurende die simulasie vir motoriste gesluit wees. Dit vind op die R399-pad tussen Builders Warehouse en Weskus Mall plaas. Kliënte van Builders Warehouse sal toegang tot die perseel hê, alhoewel verkeersbeamptes motoriste sal herlei waar die simulasie sal plaasvind, sowel as by die kruising van Florynstraat en Sterlingweg.
‘n Hommeltuig sal die simulasie op beeld vaslê.
Die oefening is daarop gemik om nooddienste se bekwaamheid te evalueer. Dit sluit die sisteme, nood-protokol, gebeurlikheidstrategieë, asook reaksiemeganisme en toerusting in.
