NOORD-KAAP. – Twee weermaglede, ‘n man en ‘n vrou, het Vrydagmidag gesterf toe ‘n SANW-vragmotor onderweg van Lohatla-weermagbasis na Kimberley op die R31 pad gerol het.
Lt. kol. Sergio Kock sê die vragmotor met 19 weermaglede het op die pad tussen Koopmansfontien en Delportshoop in reënweer gerol. Buiten twee weermaglede wat gesterf het, is 17 beseer. Hulle is vir mediese behandeling na ‘n hospitaal vervoer.
Die oorledenes se naasbestaandes moet nog van hulle afsterwe ingelig word.
Die polisie ondersoek ‘n saak van strafbare manslag en die oorsaak van die ongeluk vorm deel daarvan.
