VSA. – Altesaam 16 kinders, tussen 18 maande en 18 jaar oud, is Dinsdag uit ‘n huis in Hamden, Ohio, gered. Hulle is glo vir byna vier jaar hoofsaaklik saam in ‘n klein kamer, onder uiters haglike omstandighede aangehou. Sewe van die kinders is ná hul redding na hospitale geneem. Twee is per helikopter na traumasentrums vervoer, terwyl minstens een in ‘n kritieke toestand verkeer het. Al 16 kinders is intussen in die tydelike sorg van die staat geplaas.
Die kinders is ontdek toe wetstoepassers ‘n deursoekingslasbrief, as deel van ‘n onverwante ondersoek, by die woning uitgevoer het. Wat hulle binne aangetref het, het selfs ervare ondersoekers geskok.
Ryan Cain, balju van Vinton County, het gesê die kinders is in “afskuwelike” omstandighede aangetref. Volgens hom was daar menslike ontlasting, vullis en ‘n hoë vlak van bakteriële besmetting in die huis. Cain het gesê die kinders is meestal in ‘n vertrek van ongeveer 3,6 meter by 3,6 meter aangehou en dat die toestande slegter was as dié waarin plaasdiere normaalweg aangehou word. Sommige van die kinders kon volgens hom nie praat nie, terwyl ‘n 18-jarige wat ontwikkelingsagterstande het, nie eens haar eie naam kon skryf nie. Owerhede sê die kinders was nooit by skole ingeskryf nie en daar bestaan feitlik geen mediese rekords van hulle nie.
Die familie het oor die jare tussen verskeie plekke in suidelike Ohio verhuis, wat volgens ondersoekers waarskynlik daartoe bygedra het dat die kinders so lank buite die oog van die owerhede gebly het. Die saak het inwoners van die klein dorpie Hamden diep geskok. Baie het gesê hulle het nooit geweet soveel kinders woon in die huis nie en kan nie verstaan hoe die beweerde mishandeling vir jare ongesiens kon voortduur nie.
William Archer, die aanklaer van Vinton County, het beklemtoon dat die saak nie met mensehandel verband hou nie. Volgens hom is dit ‘n geval van ernstige mishandeling en verwaarlosing binne dieselfde familie. Vier volwassenes, die kinders se ouers en grootouers, is in hegtenis geneem. Gary Siders sr., Christine Siders, Elizabeth Siders en Gary Siders jr. staan elk tereg op 16 aanklagte van ernstige kinderverwaarlosing wat na bewering ernstige liggaamlike skade veroorsaak het. Al vier het onskuldig gepleit en borgtog van 300 000 Amerikaanse dollar elk is vasgestel.
Andy Wilson, die prokureur-generaal van Ohio, het gesê ondersoekers glo die kinders sou moontlik nie nog veel langer onder dié omstandighede kon oorleef het nie. Hy het die toneel as “suiwer boosheid” beskryf en gesê die reddingsoperasie het waarskynlik lewens gered.
Foto’s: Southeastern Ohio Regional Jail
Bronne: The Guardian, Associated Press, ABC News, Global News, CBS News, WLWT (NBC)
