KWAZULU-NATAL. – Die padverkeerinspektoraat (RTI) by die Midway-weegbrug langs die N3 het Woensdag op 17 vragmotors met vervalste lisensieskyfies en bedryfpermitte beslag gelê. Die beslagleggings is gemaak tydens die NenzaniLaEzweni-operasie van die departement van vervoer en menslike nedersettings, wat fokus op voertuie langs die N3, N2 en ander hoofroetes.
Volgens’n verklaring van Siboniso Duma, LUR vir dié departement, sal die ondersoek nie net die bestuurders nie, maar ook die eienaars van die betrokke vragmotors behels. “Om vervalste permitte en skyfies te gebruik, is nie net ’n witboordjiemisdaad nie, maar kan ook as ’n poging tot moord beskou word,” het hy gesê.
Duma sê die departement werk saam met die Truck Drivers Forum, Allied South Africa (ATDF-ASA) en ander rolspelers in die bedryf om ongewenste elemente in die logistieke sektor uit te roei.
