OOS-KAAP. – ‘n Kleuterseun (3) is na bewering op 1 September 2024 in die Gqwesa-gebied naby Sulenkama vermoor. Die plaaslike polisie het Woensdag ‘n paartjie van 32 en 23 jaar oud op die aanklag van moord in hegtenis geneem.
Volgens polisiewoordvoerder, kapt. Welile Matyolo, het die vrou die kind gedurende 2024 as vermis by Mbizana-polisiekantoor aangemeld en beweer hy het by ‘n vulstasie verdwyn. Ondersoeke, insluitend die ontleding van kringtelevisiebeeldmateriaal, het egter ’n ander weergawe bevestig. ‘n Ondersoek het bevind dat die kind na bewering met ‘n stok deur sy ma se lewensmaat – nie die kleuter se pa nie – aangerand is terwyl hulle in Sulenkama was.
Die polisie sê die verdagtes het ná die kind se dood sy liggaam in ’n 20-liter-emmer geplaas, dit verseël en begrawe. Die ma het daarna die vermistepersoonsaak oopgemaak. Ondersoekbeamptes is deur die paar na die graf gelei waar die kind se ontbinde liggaam steeds in die emmer gevind is.
Albei verdagtes word deur ‘n moordklagte in die gesig gestaar, met ’n bykomende aanklag van regsverydeling teen die vrou. Hulle verskyn vandag (Vrydag) in die Qumbu-landdroshof.
