NOORD-KAAP. – Drie mans, tussen 19 en 53 jaar oud, is in Loxton in hegtenis geneem nadat hulle vermoedelik agt steenbokke en twee hase onwettig gejag en vervoer het.
Sers. Molefi Shemane, polisiewoordvoerder, sê polisiebeamptes het Saterdag op ‘n wenk van ‘n verdagte voertuig, ’n vlootblou Ford-bakkie, op die R63 tussen Loxton en Carnarvon gereageer. Die stilstaande voertuig is langs die pad opgespoor en deursoek, wat bloed, die wild, twee honde en bloedbedekte messe aan die lig gebring het. Drie mans by die bakkie kon geen geldige jagpermitte toon of verklaar waarom hulle in besit van die diere was nie en is in hegtenis geneem.
Die polisie het op die bakkie en messe beslag gelê, omdat dit vermoedelik in die misdaad gebruik is.
