Die interstellêre komeet, 3I/Atlas, op 1 Junie vanjaar ontdek, trek wêreldwyd aandag, onder andere omdat sommige navorsers voorgestel het dat dit moontlik ’n buiteruimtelike (alien) vaartuig kan wees.
Volgens Nasa is 3I/Atlas van buite ons sonnestelsel afkomstig en wentel tans teen ‘n geweldige spoed – 58 km per sekonde – in ’n oop baan wat nie om die son wentel nie. Waarnemings toon dat dit ’n stert of wolk van miljoene kilometers lank vorm soos dit nader aan die son se hitte beweeg, omdat dit uit ‘n baie koue omgewing kom.
Wetenskap-professor Avi Loeb van Harvard, en sy kollegas het aangevoer dat 3I/Atlas dalk tegnologies van oorsprong kan wees. Loeb het gesê: “If 3I/Atlas is not an asteroid … nor a comet … then what is it?”
Nasa en die meerderheid wetenskaplikes is egter van mening dat 3I/Atlas waarskynlik ’n natuurlike komeet is. “Waarnemings bevestig dat 3I/Atlas interstellêr van aard is en daar is geen aanduiding van enige bedreiging vir die Aarde nie,” het ’n Nasa-woordvoerder gesê.
Die voorwerp bly onder waarneming deur internasionale sterrewagte.
Bronne: NASA Science, Live Science, Explorersweb
