KWAZULU-NATAL – Vier verdagtes wat glo gesoek is vir ernstige misdade, waaronder moord, poging tot moord en gewapende roof, is Dinsdagaand tydens ’n skietgeveg met die polisie in die Amatikwe-gebied 2 in Inanda, noord van Durban, dood.
Polisiewoordvoerder, kol. Robert Netshiunda, sê die polisie het betroubare inligtiging ondersoek nadat die verdagtes by hulle vermoedelike wegkruipplek, ‘n tweekamer-plakkerhut, opgemerk is. Met die aankoms van beamptes het ’n skietgeveg uitgebreek waartydens die vier verdagtes noodlottig gewond is. Volgens die polisie is vier pistole en verskeie rondtes ammunisie op die toneel gevind en in beslag geneem. Geen polisielid is in die voorval beseer nie.
Die omstandighede van die voorval sal volgens prosedure verder ondersoek word.
