MPUMALANGA. – ‘n 6-jarige seun het in die Delmas-omgewing gesterf nadat hy glo koekies van ‘n plaaslike spazawinkel geëet het. Twee spazawinkels van buitelanders is deur die gemeenskap, wat reg in eie hande geneem het, aan die brand gesteek.
Die polisie moes hulle sigbaarheid verskerp weens openbare geweld wat Donderdag uitgebreek het. Kapt. Magonseni Nkosi sê meer polisiebeamptes is ontplooi.
Volgens inligting het die seun met maagpyn en skuim om sy mond by die huis aangekom. Hy het glo van die koekies vertel wat hy geëet het. Hy is na ‘n hospitaal gehaas, maar het gesterf.
Intussen is twee verdagtes vir openbare geweld in hegtenis geneem en sal Maandag in die Delmas-landdroshof voorkom.
