POLOKWANE, LIMPOPO. – Twee mans is Woensdag in Morebeng in hegtenis geneem terwyl hulle na bewering 24 onwettige Ethiopiese immigrante in die land wou insmokkel.
Die verdagtes is op die R81 net na die Beitbrug-grenspos vasgetrek terwyl hulle vermoedelik na Gauteng onderweg was. By nadere ondersoek het die SAPD die 24 ongedokumenteerde immigrante versteek in ’n Toyota Fortuner en Hyundai H1 gevind.
Al die immigrante is tussen die ouderdom van 18 en 40. Voorlopige ondersoeke dui op die moontlikheid van ’n smokkeloperasie.
Die 24 immigrante sal vir oortreding van die immigrasiewet aangekla word, terwyl die drywers deur bykomende klagte van mensehandel in die gesig gestaar word.
Volgens lt.genl. Thembi Hadebe, provinsiale polisiekommissaris, is die inhegtenisnemings ’n duidelike bewys van die ernstige optrede van die SAPD teenoor mensehandel en uitbuiting.
Die verdagtes sal vandag in die Morebeng-landdroshof verskyn.
Foto: SAPD
Bronne: SAPD, Twitter
