NOORDWES. – Die polisie het Donderdag vervalste goedere ter waarde van meer as R8 miljoen en R30 000 in kontant in Rustenburg gekonfiskeer.
Lt.kol. Amanda van Wyk sê polisielede van verskeie eenhede, die departement van inkomste, doeane, sekuriteitsbeamptes en Brand Protectors was by die operasie betrokke.
Inligting van verskeie winkels wat in Rustenburg in vervalste goedere handel dryf, is ontvang en ‘n soek-en-beslagleggingslasbrief is uitgereik. Klere, skoene, pette en sakke is gekonfiskeer. Twee verdagtes sal vir die oortreding van die wet op vervalste goedere en die immigrasiewet aangekla word.
Van Wyk sê die polisie en verskeie rolspelers het sedert November 2023, toe die eenheid gestig is, tot op hede, op meer as R200 miljoen se vervalste goedere en R1 miljoen in kontant beslag gelê.
