VRYSTAAT.- ‘n Man (23) het glo Vrydag omstreeks 12:30 sy oom (30) met ‘n mes op Sandrai-plaas gesteek en gevlug, waarna hy in hegtenis geneem is.
Sers. Mahlomola Kareli sê die verdagte en oorledene het saam gesit toe ‘n argument uitbreek en die oom glo deur sy susterskind gesteek is. Met aankoms van polisielede op die toneel is die lewelose liggaam van die oorledene op die grond onder ‘n kombers gevind. Hy het ‘n steekwond aan sy bors gehad.
Die verdagte is deur die Warden-polisie gesoek. Hy is op Mphatlalatsane in Phuthaditjhaba opgespoor en in hegtenis geneem.
Die verdagte sal op ‘n aanklag van moord in die Warden-landdroshof verskyn.
