NEW YORK. – ’n Piesang wat met silwer kleeflint aan ’n muur vasgeplak is, word binnekort vir tussen R19,000,000 en R29,000,000 verkoop by Sotheby’s in New York.
Die kunswerk, Comedian, deur die Italiaanse kunstenaar Maurizio Cattelan, het in 2019 opslae gemaak toe dit by die Art Basel Miami Beach-kunsfees uitgestal is. Dit is toe vir R2,400,000 per uitgawe verkoop. Een van die piesangs is later deur ’n ander kunstenaar geskil en geëet voor honderde mense nadat hy die piesang van die muur af gegryp het. Hy het dit later verdedig as ‘n artistieke optrede in eie reg en nie ‘n daad van vandalisme nie.
Luidens Sotheby’s is Comedian ’n konseptuele stuk. Die nuwe koper kry nie die oorspronklike piesang nie, maar eerder ’n rol kleeflint en een piesang, asook ‘n sertifikaat van egtheid en instruksies om die werk self op te stel. Die piesang en kleeflint moet gereeld vervang word.
Hoewel sommige mense die werk as ’n grap beskou, laat dit steeds vrae ontstaan oor wat kuns regtig beteken en hoe waarde daaraan gekoppel word.
Bron: Sotheby’s
