KWAZULU-NATAL. – ‘n Chemiese ontploffing wat Maandag by ‘n fabriek in Balfourstraat in die omgewing van Jacobs, suid van Durban, plaasgevind het, het die lewe van een persoon geëis.
Garrith Jamieson van ALS Paramedics sê dié diens is kort na 12:45 na die fabriek waar chemikalieë ontplof het. Met aankoms op die toneel, wat as chaoties beskryf is, is drie beseerde persone aangetref, waarvan ten minste een kritiek was. Paramedici het die beseerdes op die toneel gestabiliseer. Een persoon het as gevolg van beserings hartstilstand ervaar en is dood verklaar. Die ander beseerdes is vir verdere mediese versorging na hospitale vervoer.
Jamieson sê ‘n ondersoek vind plaas om die oorsaak van die ontploffing vas te stel.
