KWAZULU-NATAL. – Twee vermeende rowers is vroeër vandag (Dinsdag) deur die polisie tydens ‘n skietery in Nhungwane Area 1, Inanda, doodgeskiet.
Kol. Robert Netshiunda sê die polisie het inligting van verdagtes wat glo by huisrowe en ander misdade in die area betrokke was en in ‘n huis is, ontvang. ‘n Operasie is geloods en met dié wat die polisie hulle aanwesigheid aankondig deur aan die deur te klop, is daar op hulle geskiet. Die polisie het teruggeskiet en twee verdagtes is noodlottig gewond. Twee vuurwapens is gekonfiskeer en nog ‘n verdagte is gearresteer.
Netshiunda bevestig met voorlopige ondersoek is vasgestel die verdagtes het bande met die Inanda West-bende.
Die gearresteerde verdagte sal na verwagting binnekort op aanklagte in die hof verskyn.
