CHICAGO, VSA. – ‘n Vliegtuig van Southwest Airlines het gister byna met ‘n privaat vliegtuig by die Chicago Midway-lughawe gebots terwyl dit probeer land het.
Lees ook: United Airlines-vliegtuig maak noodlanding
Die vliegtuig was op pad om te land toe ‘n klein Flexjet-vliegtuig voor die Boeing ingetrek het. Die Boeing moes weer hoogte kry om ‘n botsing te verhoed.
Data van die lugbeheer het gewys die privaat vliegtuig is toegelaat om oor een aanloopbaan te gaan, maar is beveel om te wag sodat die Southwest-vliegtuig kan land. Die vlieënier van die privaat vliegtuig het die instruksies verkeerd aan die beheertoring herhaal en is gekorrigeer. Hy het toe die instruksies reg herhaal, maar het steeds in die Southwest-vliegtuig se pad inbeweeg.
Personeel van die beheertoring het die vlieënier van die privaat vliegtuig weer beveel om stil te staan en die Southwest-vlieënier het toe gesê hulle gaan “omvlieg”.
Na die Southwest-vliegtuig weer in die lug was, het lugbeheer vir die vlieënier van die privaat vliegtuig gesê om verder op die aanloopbaan te beweeg en te stop. Lugbeheer het vir die vlieënier gesê: “Jou instruksies was om stil te staan”.
Flexjet het gesê dit ondersoek die voorval. Die Federale Lugvaartadministrasie en die NTSB is ook besig om die voorval te ondersoek.
Southwest Airline pilots SAVED THE DAY! Great job going around at the last minute to avoid a collision from a runway incursion. pic.twitter.com/FjzoqIzH73
— Combat Learjet (@Combat_learjet) February 25, 2025
Bronne: The Independent, NBC Chicago, X
