KWAZULU-NATAL. – ‘n Verdagte sakebestuurder (36) is deur die polisie vir die beweerde vervaardiging van onwettige drank met ‘n geskatte waarde van R1.5 m. gearresteer. Die besigheid word na bewering op ‘n plaas op die verlate R104-pad in die Umhlali-gebied bedryf.
Kapt. Alex Thomson sê ‘n multidissiplinêre operasie is geloods, waarna die arrestasie gemaak en die vervalste en onwettige drank gekonfiskeer is. Beslag is gelê op meer as 26 000 sakkies met drank met ‘n plaaslike handelsmerk, bokse vervalste drank en 5 000 liter houers met etanol wat gebruik word om drank te vervaardig. Swaar masjinerie waarmee alkohol gedistilleer, gemeng en verpak word, is op die perseel aangetref. Drank, insluitende handelsmerkalkohol, is glo aan verskeie sakepersele in die Ballito-gebied verskaf.
Thomson sê die verdagte is vir die vervaardiging en verspreiding van onwettige alkohol aangekla en sal binnekort in die KwaDukuza-landdroshof verskyn.
