WES-KAAP. – Andile “Ace” Ncobo (57) en Salome Twaise Ncobo (47) sy vrou, verskyn vandag in die Bellville-landdroshof op aanklagte van bedrog en geldwassery, wat verband hou met miljoene rande vir ‘n projek in die Oos-Kaap. Ncobo is die voormalige bestuurder van die Premier Sokkerliga (PSL) asook voormalige internasionale skeidsregter.
Die egpaar is deur Times Live en op Facebook in die 10 jaar oue ondersoek geïdentifiseer.
AO Zinzi Hani, woordvoerder vir die Valke, sê die verdagtes het na bewering verkeerde voorstellings aan PetroSA gemaak dat Junior Sekondêre Skool Gangatha infrastruktuurfinansiering benodig het. Voorleggings ondersteun deur vervalste trustaktes en skenkerdokumentasie is ingedien, wat die vals indruk geskep het dat Gangatha Projects, ’n nie-geregistreerde entiteit, ’n wettige kanaal vir skoolontwikkeling is. Die trustakte wat met King’s Gangatha Building Trust geassosieer word, was nie geregistreer nie en die handtekeninge is glo vervals. PetroSA het op grond van hierdie voorstellings ongeveer R13 miljoen aan Gangatha JSS betaal.
Die skema is uitgevoer deur die indiening van vervalste dokumente, die skepping van fiktiewe of nie-geregistreerde entiteite en die daaropvolgende geldwassery van die opbrengs deur persoonlike rekeninge.
Hani sê die ondersoek duur voort.
Het jy kommentaar oor die berig? Jy kan nou aan Nuusflits lesersbriewe skryf en dalk word joune gepubliseer. Rig jou brief aan die redakteur by [email protected]
