KWAZULU-NATAL. – ’n Vrou in haar laat veertigs is Saterdag net ná middernag ná ’n beweerde huishoudelike voorval dood aangetref. Talle noodoproepe is ontvang, waarna nooddienste na die toneel in Finfootweg, Woodlands, suid van Durban, is.
Garrith Jamieson van ALS Paramedics sê paramedici is op die toneel deur die polisie die huis binnegelei waar hulle op ’n grusame toneel afgekom het. Daar word beweer die vrou is herhaaldelik met ‘n skerp voorwerp tydens ‘n huishoudelike rusie gesteek. Sy is op die toneel aan haar beserings oorlede. ’n Man, ook in sy veertigs, is met veelvuldige steekwonde op die toneel aangetref. Hy was in ’n ernstige toestand en paramedici moes hom stabiliseer voordat hy onder polisiebewaking na ’n nabygeleë hospitaal geneem is.
Jamieson sê voorts die presiese omstandighede aangaande die voorval is onbekend, maar word deur die polisie ondersoek.
